Hubog nag-amok 4 ang gidunggab

CEBU, Philippines - Upat ang nalandig sa tambalanan human usa ka hubog ang nag-amok sulod sa usa ka videokehan sa may merkado publiko sa sitio Tunga barangay Matab-ang dakbayan sa Toledo niadtong Domingo sa hapon.

Si SPO3 Gil Lastimosa sa kapulisan sa dakbayan sa Toledo nga nahinabi sa Banat News miila sa mga biktima nga sila si Alberto Rabanes, 32, nakaangkon og samad dinunggaban sa tiyan, Ricardo Basillote, 26, samad usab sa tiyan, Felicidad Rabago, 55, nakaangkon og samad sa iyang bugan ug anak niining si Julan Rabago, 16, nakaangkon og samad sa dughan pulos nagpuyo sa nahisgutang lugar.

Samtang ang nag-amok nga silingan kinsa nadakpan dayon mao si Dante Castillano ug nadala usab sa Cebu City Medical Center human usab kini dunggaba diha sa liog.

Matud pa ni SPO3 Lastimosa nga ang suspetsadong si Castillano uban sa iyang amahan nga si Tito Castillano ingon man bayaw nag-inom sa videokihan nga gipanag-iya sa pamilyang Rabago.

Dihang nahubog na nagmaoy ug kalit lang nag-amok ug dayon gipangdunggab ang mga biktima, unang gidunggab sila si Rabanes, Basillote ug gisunod pagdunggab ang mga Rabago.

Human sa hitabo ang mga biktima gidali sa pagdala sa Balamban District Hospital apan gibalhin sa tambalanan dinhi sa dakbayan sa Sugbu gumikan sa mga samad dinunggaban nga naangkon.

Samtang ang akusado nadakpan sa kapulisan apan nadunggaban usab kini apan way bisan usa ang makasulti kun si kinsa usab ang midunggab sa tangkugo sa akusado.

Ang amahan sa suspetsado nga si Tito kinsa gikatahong nagpabuto pa sa iyang armas niadtong higayuna gibalhog sa kapulisan sa bilanggoan apan gibuhian human usab walay nakuhang armas niini. – BANAT NEWS