Paghawan sa Citi-center gikasurpresa

CEBU, Philippines – Nasurpresa si Kapitan Celestino Avila sa Kamagayan sa plano sa kagamhanan sa dakbayan sa Sugbu paghawan sa Citi-Center Commercial Complex diha sa ilang barangay.

Ang nakapakurat ni Avila mao ang giingong kapakyas sa City government pagpahibawo kaniya aron mapahimangnoan ug makapangandam usab ang mga molupyo.

Giukupahan ang nahisgutang building sa ubay-ubay nga mga squatters, lakip na niadtong nalambigit sa ilegal nga drugas, babayeng nagbaligya sa dungog, kawatan, snatchers ug uban pa.

“Dili gyud ni madali-dali kay asa man nila papuy-on ning maapektahan unya sa demolisyon kun papahawaon gyud nila,” sumala ni Avila.

Nagkanayon ang kapitan nga duna na untay gitanyag kaniadto ang City government nga relocation site alang sa mga squatters diha sa Citi-Center apan ang lugar diha sa Canduman, Mandaue nga mao untay balhinan giingong lain na ang namuyo.

Ang barangay kapitan gitakdang makigkita kagahapon ngadto kang City administrator Bimbo Fernandez kinsa maoy mipahibawo pag-clear sa Citi-Center Commercial Complex sulod niining buwana tungod kay giingong gamiton na sa siyudad ang maong lugar. (Elly Bolonos) (BANAT NEWS)