5-anyos gidagit, gi-uli

CEBU, Philippines – Naukay kagahapon sa hapon ang pamilya ug kahigalaan sa usa ka negosyante sa dihang nag-inusarang nahibalik ang singko-anyos nga batang babaye nga gikatahong gidagit niadtong Pebrero 26 sa tunghaan niini.

Si Sohaiba Punut, tinun-an sa kinder-1 sa Mambaling Elementary School, gibilin sa wala mailhing tawo sa ganghaan sa usa ka mall sa dalan Colon human na-missing sa dihang gidagit sa usa ka wala mailhing babaye (gituohang tomboy) nga nagsakay og motorsiklo sa alas 12 sa udto sa naasoy’ng petsa.

Sa dihang gikahinabi sa mga tigbalita, ang bata miasoy nga gihatod lamang siya sa iyang “amiga” sakay sa jeep de pasaheroan.

Dugang pa sa bata nga pinangga kaayo siya sa babaye nga nagkuha kaniya.

Nakita hinuon sa inahan sa bata nga himsog kini ug walay senyales sa pagpamun-og. Giasoy sa bata nga gipakaon siya sa nagdagit niini.

Apan sa dihang gipangutana ang bata kung asa nga lugar siya gidala, igo lamang kining naglingolingo.

Ang inahan nga si Sanairah Punut, 26, biyuda, nangayo og panabang kagahapong adlawa kang Cebu City Police director Patrocinio Comendador.

Human niini, gipagawas sa kapolisan ang cartographic sketch sa nawong sa babaye nga giingong midagit sa bata.

Ang inahang mipahibalo nga mohatag sila og reward sa tawo nga mouli sa iyang anak.

Si Sanairah nagkanayon nga nabalaka sila sa nahidangatan sa iyang anak ilabi nga walay nanawag kanila nga nagdemanda og ransom o nagpahibalo sa kahimtang sukad sa pagkawala niini.

Pipila ka gutlo ang nakalabay sukad sa pagduaw ni Sanairah sa CCPO, mipahibalo kini sa kapolisan nga nahibalik na ang bata sa Collonade mall.

“Ako nagpasalamat ko sa nidala sa akong anak kun kinsa man gani sila pero unsaon man pud ani nga ala man ko kaila nila. Dili usab tiaw-tiaw oy, kay bata baya ning ilang gidala,” matud ni Sanairah.

Ang nagdagit sa bata gibanabanang nagpangidaron og 28 ngadto sa 30 anyos, may barog nga 5’5” nga may kasarangan ang lawas ug morena ang pamanit ug giingong tomboyon ug may inestoryahang Maranao.

Si Sr. Supt. Comendador miingon nga wala sila makadawat og report nga adunay bata nga gidagit kun dili usa lamang ka missing person alarm.

Ang uyoan ni Sanairah nga si Sultan Naif Punut nga maoy tag-iya sa tindahang giabangan niini sa Collonade Mall midangop kang Cebu City acting Mayor Michael Rama. Si Sultan Naif consultant on Muslim Affairs sa Cebu City Hall.

Tungod niini, si Sultan Naif mismo ang mipahibalo nga andam silang mohatag og P20 milyones nga reward sa makahatag og kasayuran sa pagdagit sa anak sa iyang pag-umangkon. –BANAT NEWS