DPWH gipatawag ni Salimbangon

CEBU, Philippines – Gipatawag ni Kongresista Benhur Salimbangon ang mga opisyal sa Cebu First Engineering District tungod sa pagkalangay sa ubay-ubay’ng mga proyekto sa iyang distrito.

Upat ka mga steel bridges nga nagkantidad og P80 milyones sa iyang distrito nga mahuman unta sa miaging tuig wala gihapon mahuman hangtod karon, sumala pa ni Salimbangon.

Si Mario Montejo, district engineer sa distrito ni Salimbangon, mipasabot nga ang pundo sa maong upat ka taytayan nga nagkantidad og P20 milyones matag usa nga maglagbas sa San Remegio ug Tabuelan gipaabot pa nga isyuhan og notice to proceed sa dili pa makasugod ang midaog nga kontraktor.

Sa susamang kalambuan, si Salimbangon nga nahinabi sa mga tigbalita nagkanayon nga misang-at na siya og balaodnon sa Ubos Balay Balaoranan alang sa P200 milyones nga special appropriations nga gamiton sa pagpaabot sa mga karsada, mga school-buildings ug ubang inprastraktura nga nangaguba tungod sa bagyong Frank.

Nakita sa pagtuon nga gihimo sa National Disaster Coordinating Council ug Department of Public Works and Highways (DPWH) nga nakamugna og dakong kadaot ang bagyong Frank sa mga lungsod sa San Remegio, Medellin, Daanbantayan, Sta. Fe, Bantayan ug Madredijos.

Gipahibalo usab ni Salimbangon nga ang P20 milyones nga Maya-Daanbantayan access road gipaubos na sa subasta ug gipaabot nga mahuman sulod sa upat ka bulan.

Kahinumduman nga si Salimbangon mismo ang mihatag og briefing kang Pres. Gloria Macapagal-Arroyo kalabot sa rehabilitation/construction sa Bogo-Curva-Medellin-Daanbantayan-Maya Road, nga 75 porsiyento nang kumpleto sukad sa Enero ning tuiga.

Kini nga proyekto nagkantidad og P39,243,905.54 nga may gitas-ong 2,698 metros.

Tipik kini sa Nautical Highway Program ni Pres. Arroyo ug gipaabot nga makapakusog sa turismo sa ika-upat nga distrito. (John Rey Saavedra) (BANAT NEWS)