Pagka-Regional Director sa CHED Aytona o Ancheta?

CEBU, Philipines – May kalagmitang matudlo pagka- Regional Director sa Commission on Higher Education (CHED 7) si Dr. Candelario Aytona tungod kay daghan kini og suporter.

Pipila sa mga misuporta ni Aytona mao ang usa ka kongresista dinhi sa Sugbo ug uban pang mga lokal nga opisyal sa kagamhanan.

Hinuon ang konseho sa dakbayan sa Mandaue mitugpo kang Dr. Rosein Ancheta, kasamtangang dean sa University of the Visayas nga maoy pakupton sa dakong katungdanan diha sa CHED 7.

Si Majority Floor Leader Victor Biaño sa konseho sa Mandaue maoy nangamahan sa resolusyon nga nag-awhag kang Presidente Gloria Macapagal Arroyo sa pagduso kang Ancheta nga mahimong regional director sa CHED 7.

Gitumbok sa maong resolusyon ang matud pa katakos ug kahaom ni Ancheta sa maong katungdanan gumikan matud pa sa kalapad na og kasinatian niini.

Apan samtang nagpanikad ang konseho sa dakbayan pag-awhag kang Presidente Arroyo sa maong katuyoan, si Kongresista Nerissa Soon Ruiz sa ika-unom nga distrito sa Sugbo ug si Mayor Jonas Cortes sa dakbayan sa Mandaue mirekomendar usab kang Aytona sa maong katungdanan.

Anhi dinhi makita kun kinsay hatagan og unang pagtagad sa Pamuno nasud, ang konseho ba sa dakbayan sa Mandaue o kaha si Soon nga tua kanunay sa Malacañang.

Si Cortes sa iyang bahin miingon nga si Aytona nagserbisyo na sa maong katungdanan sulod sa 39 na katuig ug takdo kaayo sa maong katungdanan ilabi na nga usa usab kini ka doctor of education.(Romeo T. Limpangog) (BANAT NEWS)