Napatay nga "pusher" gipik-up ra sa asset

CEBU, Philipines – Nangayo og hustisya ang mga ginikanan sa usa ka batan-ong lalaking namatay atol sa anti-illegal drugs operation sa Mandaue City Police Office (MCPO) nga giingong una nang nadakpan sa buybust operation apan gihimo pa hinuong “guide” sa mga polis ug napusilan-patay hinuon sa pagronda sa panimalay sa gikatahapang mas dakong drug pusher.

Ang ginikanan sa namatay hugtanong mihimakak sa kalambigitan ni Rodulfo Sabrozo Jr., 21 sa giingong illegal nga pagpamaligya niini og shabu.

Si Sabrozo nasikop sa mga sakop sa City Anti-Illegal Drugs Special Operations Task Force pinanguluhan ni PO3 Benedict Modina human kini mapaliti og usa ka paketeng shabu ug nakuhaan og dugang siyam pa ka pakete.

Si Sabrozo sumala pa sa kapolisan miboluntaryong kuyogan ang mga polis sa panimalay sa usa ka Inday Catanduay nga giingon niyang “shabu queen” sa ilang dapit, apan sa pag-abot sa dapit kalit nga napusilan si Sabrozo ug ang usa ka 13-anyos.

Nagduda ang kabanay ni Sabrozo nga asset sa kapolisan nga kuyog sa operasyon ang mipusil kaniya ug dali usab kaayong nakapahilayo sa maong dapit.

Gikatahong gipik-ap sa usa ka asset si Sabrozo sa ilang balay ug nahibulong nalang silang nahibaw-an nilang gipusil na kini.

Buot karon sa pamilya nga ipa-police line up ang mga mikuyog sa maong operasyon alang sa pag-ila sa mga nakasaksi.

Si Sr. Supt. Orlando Ualat, acting director sa MCPO nga nahinabi sa Banat News mipadayag nga mosanong sa pagpahigayon og police lineup kon maoy gipangayo sa mga ginikanan sa namatay.

Gitataw niya nga katungod sa mga ginikanan ang pagpangayog hustisya kon nagbaton man kini og katahap sa operasyon.

Si Ualat miingon nga legal ang operasyon sa CAIDSOTF ug may koordinasyon kini sa Philippine Drug Enforcement Agency (PDEA) 7 sa wala pa kini himoa.

Sa gipadalang pamahayag sa PDEA-7 sa Banat News, si director Randy Pedroso mikumpirmar nga may koordinasyon sa ilang buhatan ang Mandaue CAIDSOTF apan walay bisan usa ka ahente nila nga mikuyog sa operasyon.

“Walang kinalaman ang PDEA at walang kasamang PDEA agents sa operation na iyon. Kung nagpapanggap sila na PDEA, we strongly condemned that misrepresentation. Hindi natin pinapayagan na gamitin ang pangalan ng opisina sa mga pangyayaring wala tayon kinalaman,”matud ang Pedroso.

Andam usab siyang ipa-police lineup ang iyang mga sakop aron maklaro kung kinsay namakak, matud niya daghan nga insidenteng gigamit ang pangalan sa PDEA ug mibahad nga ilang kasuhan ang si bisan kinsang madakpang mihimo niini. (Romeo Limpangog ug report ni Lesly Caminade) (BANAT NEWS)