Midwife gipatay sa iyang drayber

CEBU, Philipines – Patay ang usa ka midwife human kini gitusaktusak og dunggab sa iyang kaugalingong drayber nga giingong karelasyon usab niini sud sa ilang panimalay tungod sa selos pasado alas-4 sa hapon sa miaging adlaw sa Holy Family Road Nivel Hills barangay Lahug ning dakbayan.

Si Dee Ann Alcala, 33 usa ka licensed midwife ug usa ka sales manager sa usa ka dental ug medical supplier gidunggab ni Onisimo Taningco Jr. nga giingong family driver nila kaniadto.

Matud pa ni Diane Angela, igsuon sa biktima nga sa wala pa mahitabo ang pagpangdunggab nakadawat siya og text message gikan sa suspetsado nga nagkanayon nga “kita lang ta Sunday, love you” hinungdan nga iya kining gitubag nga wrong send.

Sa ilang panagkita sa suspetsado iya kining gisungog-sungog ug iyang giingnan ang biktima sa mga gipang-text sa suspetsado.

Apan sa pagka-Domingo kalit lang miabot ang suspetsado ug naabtan ang biktima nga nag-atubang sa computer ug gihangyo kining makigestorya apan gibalibaran kini sa bikima.

Matud pa sa anak dihang nag-estorya na ang inahan ug suspek sa gawas mao nalay nadunggan niya nga nagsininghagay ang duha ug gilabay og botelya sa iyang inahan ang suspek.

Dihang misulod sa balay ang biktima misunod ang suspek nga nagpunay og sininghagay ug giusban kini og labay og botelya sa inahan ug diha na nahitabo ang pagpunit sa suspek og kutsilyo dungan sa pagkupot sa liog sa babaye ug gitusak-tusak og kutsilyo.

Misuway unta ulang ang kinamaguwangang anak apan gihanaan siya og duslak sa suspek maong mipalayo nalang siya ug matud pa giusban sa suspek og dunggab-dunggab ang inahan diha sa likod.

Matud pa ni SPO4 Alex Dacua sa Homicide Section lima ka tuig ng buwag sa bana ang biktima, dugang pa niya nga nasuko ang suspek nga di pakuyogon sa manag-inahan nga manglaag nianang adlawa.

Ang suspek gikatahong maoy tighatud-kuha sa mga anak sa biktima sa tunghaan ug maoy kanunay niining kuyog-kuyog sa mga lakaw, matud pa sa igsuon sa gipatay.

Ang igsuon miangkong wala sad sila masayod sa tinuuray nga relasyon sa iyang igsuon ug sa suspetsado. –BANAT NEWS