Depositor sa Rural Bank pahugpongon

CEBU, Philippines - Ang paghugpong sa mga depositor sa mga rural bank nga ubos sa Legacy Group of Companies (LGC) aron kapasakaan og kaso ang tagdumala ug tag-iya sa maong kompaniya   maoy labing gikinahanglan niining panahona.

Mao kini gibutyag ni Senador Mar Roxas kagahapon atol sa pagbukas sa One Visayas didto sa Cebu International Convention Center (CICC) .

Matud pa ni Roxas nga andam nga motabang ang iyang buhatan sa paghimo og mga lakang batok kang Celso delos Angeles nga maoy tag-iya sa LGC.

Si Roxas miingon nga nahimong makaluluoy ang mga depositor sa rural bank nga gipanag-iya ni delos Angeles karong panahona.

Nasayran ni Roxas nga dili tiaw ang paningkamot sa mga depositor nga makahipos og kuwarta sa bangko apan napagan lang sa tinonto ni delos Angeles.

Dugang pa ni Roxas nga gikinahanglan kaayo ang panaghiusa sa mga depositor aron paghimo og lakang sa paggukod kang delos Angeles aron mapahamtangan kini og bug-at nga silot.

Gitug-an ni Roxas nga nagpadayon na karon ang iyang buhatan sa pagpanghipos sa mga ngalan sa maong mga depositor alang sa epektibong lakang nga ilang buhaton aron nga ikapaslak sa prisohan si delos Angeles.

Si Senador Roxas mibisita sa Sugbo kagahapon isip pinasidunggang mamumulong sa pagbukas sa One Visayas.

Ang One Visayas maoy pagpasundayag sa mga mahinungdanong produkto sa matag lalawigan nga sakop sa Central Visayas-diha sa CICC. – BANAT NEWS