Ulo sa naligsan napiyapi

CEBU, Philippines - Napiyapi ang ulo sa patay'ng lawas sa usa ka 2nd year high school nga lalaki human malamba ang gisakyan niining motorsiklo sa dihang nasabod kini atol sa pag-overtake og bisikleta ug nalabay taliwala sa karsada ug nalabay pa gyud sa pikas linya ug naatol nga nagginukdanay ang multicab ug Isuzu Elf hinungdan nga naligsan kini samtang nagkamang na unta paingon sa daplin sa karsada didto sa highway sa barangay Looc, siyudad sa Danao niadtong Sabado sa alas 6:40 sa buntag.

Gawas niini, naangol usab ang drayber sa motorsiklo nga nakuyapan human mapantok sa karsada ingon man ang 11-anyos nga lalaki nga nagsakay sa bisiklita.

Ang namatay mao si Gerald Capuyan Caraso, 14, molupyo sa moang lugar ug 2nd year high school sa Sabang National High School, samtang ang drayber sa gisakyan niining motorsiklo mao si Joselim Juntilla, molupyo sa maong lugar ug laing naangol mao ang usa ka 11-anyos nga sakay sa bisiklita nga si Loue Muñoz, 11 anyos, nagpuyo gihapon sa maong dapit.

Matud ni SPO1 Renante Manulat, imbestigador sa Traffic Group sa Danao City Police Station sa dihang nahinabi sa Banat News subay sa inisyal nilang imbestigasyon ang biktima nagpahatod kini sa iyang silingan sa motor paingon sa ilang eskuwelahan alang sa review sa ilang final exam apan paghiabot nila sa maong lugar misuway kini og overtake sa bisiklita nga gimaneho sa 11-anyos nga lalaki apan aksidente kini nga nasabod hinungdan sa pagkalamba sa bisiklita.

Gumikan sa maong hitabo nawad-an og preno ang motorsiklo ug pag-abot sa unahan nalamba usab kini taliwala sa karsada ug ang drayber napantok sa semento ug nakuyapan samtang ang biktima nalabay sa pikas linya sa karsada.

Matud sa mga nakasaksi atol sa pagsukitsukit sa kapolisan naatol nga naglumbaanay ang multicab close van kolor puti ug usa ka Isuzu Elf ug naligsan niini ug nalatayan sa ulo ang biktima samtang nagkamang kini paingon sa daplin sa karsada.

Matud ni SPO1 Manulat napiyapi ang ulo sa biktima ug patay kini dihadiha samtang ang drayber sa motorsiklo gidala lahos sa tambalanan dinhi sa dakbayan sa Sugbu tungod sa dakong samad sa agtang niini nga nalamba sa karsada ingon man naangol usab ang 121 anyos nga batang lalaki nga sakay sa bisiklita.

Daling nakig-alayon ang kapolisan sa Danao sa mga kasikbit nga lungsod hinungdan nga na-intercept ang multicab nga kolor lightblue didto sa lungsod sa Catmon apan atol sa pagsukitsukit sa mga polis wala kini nakakita og ebidensiya nga magpamatuod nga mao kini nakaligis sa biktima apan gikuhaan kini og mga dokumento alang sa dugang imbestigasyon.

Matud ni SPO1 Manulat padayon pa ang ilang imbestigasyon sa maong hitabo ug apil sa giimbestigar ang drayber sa motorsiklo nga nalandig pa karon sa tambalanan ug gipangita pa sab ang drayber sa Isuzu Elf. – BANAT NEWS