One Visayas pormal gibuksan

CEBU, Philippines - Si Senador Mar Roxas ug tourism secretary Joseph “Ace” Durano maoy nangulo sa gipahigayun nga pormal nga pagbukas sa usa ka semanang kalihukan sa One Visayas nga gipasiugdahan sa kagamhanan sa probinsiya sa Sugbo sa Cebu International Convention Center (CICC) kagahapon sa buntag.

Si Gobernador Gwendolyn Garcia ug ang mga mayor sa kalungsoran pinangulohan sa presidente sa Municipal Mayors League nga si Dumanjug Mayor Cesar Baricuatro maoy niabi-abi sa mga dinapit sa maong kalihukan.

Ang One Visayas gitumong aron paghiusa sa tanang mga lugar dinhi sa Visayas nga dunay 16 ka mga probinsiya ug tulo ka mga rehiyon sama sa region 6, 7 ug 8 diin apil sa nitambong sa maong kalihukan ang mga mayor ug gobernador sa maong mga lugar.

Atol sa papadayag sa iyang mensahe si Roxas mipasabot nga ang katukoran sa One Visayas usa ka maayong lakang nga gitumong aron magkahiusa ug magtinabangay ang tanang mga molupyo dinhi sa Kabisay-an pagpalambo sa pagpuyo ug kaugmaon sa mga molupyo niini taliwala niining giatubang nga kalibutanong krisis sa ekonomiya.

Nunot niini gipasalamatan og daku sa senador ang mga lokal nga opisyal nga maoy utok pagmugna ning maong matang sa kahiusahan.

Samtang si Durano mihangop usab dayon niini tungod kay nagtuo siyang makatabang gyud kini og dako sa natad sa turismo ug kini gipanglantawan niyang makapalambo ug makapalig-on pa sa Kabisay-an nga karon naila nang tourist destination ingon man industrial hub.

Hinuon daling gisalikway sa kalihim ang mga tabi-tabi nga ang katukoran sa One Visayas gitumong lang pagpapalig-on sa kandidatura ni Roxas nga mipadayag nang daang magpapili pagka-presidente sa nasud unya sa 2010 national election.

Matud ni Durano daan nang suportado si Roxas sa Kabisay-an bisan sa wala pa mamugna ang One Visayas.

Samtang giklaro sab ni Roxas sa iyang bahin nga pagkakarun dili politika maoy iyang prayoridad kundili ang pag-atiman sa mga giatubang nga dagkong problema sa nasud sama sa paghatag og higayun nga makapalit og baratong tambal ilabina ang mga kabus nga gihulagway niya nga gipasagdan nalang karon sa gobiyerno.

Si Roxas maoy author sa Cheaper Medicines Act nga tumong ang baratong tambal alang sa katawhan. – BANAT NEWS