CEBU, Philippines - Nagtingkagol og balik sa prisohan ang usa ka ex-convict human kini hidakpi sa kapolisan nga nanglabni og cell phone didto sa barangay Bulacao, dakbayan sa Talisay niadtong Biyernes sa hapon.
Ang suspetsado mao si Antonio Ablin, 33, taga sitio Kinto Limbo sa nahisgutang barangay.
Samtang ang biktima mao si Ace Constantino, 21, taga Saint Jude Acres Phase II, Bulacao, Pardo, dakbayan sa Sugbo.
Base sa talaan sa mga polis, si Constantino nagsakay og PUJ gikan sa barangay Bulacao, dakbayan sa Sugbo, paingon ngadto sa Tabunok, dakbayan sa Talisay, samtang ang suspetsado kauban usab niyang pasahero sa PUJ nga iyang gisakyan .
Apan wala makabantay ang biktima dihang kalit lang gilabni sa suspek ang iyang cell phone, ug diha-diha milayat sa jeep ang maong suspetsado.
Apan nataymingan nga sa pag-ambak sa suspek maoy iyang nasugatan ang mga kapolisan nga sila si PO1 Ruby Sabandeja, PO1 Rol Bryan Wahing, PO1 Bienvenido Balaro ug PO1 Luz Cedeno nga ubos sa Field Training Program (FTP) busa gigukod dayon niini ang suspetsado hangtod nga kini nasikop.
Si Chief Inspector Jovito Canlapan, Deputy sa Talisay City Police Station mibutyag sa Banat News nga si Ablin usa ka ex-convict ug niadtong adlaw nga nanglabni kini og cell phone, mao pa kadtoy paggawas niya gikan sa Bagong Buhay Rehabilitation Center (BBRC).
Si Canlapan midugang nga nakonbikto sa kasong pagpangawat si Ablin hinungdan sa pagkapriso niini. - Brenda D. Batuto (BANAT NEWS)