Lasbag nga tanod nanghasi gipriso

CEBU, Philippines - Nabalhog sa prisohan ang usa ka barangay tanod kinsa gawas nga puwerting lasbaga, may gitangkil pang armas de fuego nga walay lisensya unya nanghulga nga patyon ang ilang kapitan sa barangay Gaas, lungsod sa Balamban niadtong Biyernes sa hapon.

Si Romeo Macapaz ,38, barangay tanod sa Gaas gipasakaan na og kasong illegal possession of firearm ngadto sa husgado sa Balamban pinaagi sa kapolisan sa maong lungsod.

Si SPO4 Marcial Montebon sa Balamban Police Station nga nahinabi sa DYSS Super Radyo ug sa Banat News nagkanayon nga si Macapaz nasakmitan sa iyang 357 kalibre nga revolver ug lima ka mga buhing bala niini.

Sa wala pa masikop si Macapaz, puwerting isoga niining nanghulga nga mopatay kang Kapitan Ebaresto Traya sa Gaas kay nasuko kining gibadlong sa kapitan gumikan sa iyang kahubog.

Matud pa ni SPO4 Montebon nga didto gyud magpakita sa iyang abilidad si Macapaz sa daghang tawo nga nanabo didto sa Gaas niadtong Biyernes sa hapon.

Gani matud pa ni SPO4 Montebon nga mikabad og panagan ang mga tawo dihang nanghasi na si Macapaz ug mihulga na nga patyon niini si kapitan Traya pinaagi sa iyang armas de fuego.

Gumikan sa gibuhat ni Macapaz, nahiabot dayon ang mga kapolisan nga nadestino sa Regional Training Course diha sa nahisgutang barangay ug dali ra kaayo siyang gisignit.

Dihadiha nasakmit dayon sa kapolisan ang iyang armas de fuego ug gi-turn-over usab dayon ang maong suspek ngadto sa kapolisan sa Balamban diin tua na siya karon magtingkagol sa mabugnaw nga prisohan sa lungsod. - Uban sa report ni Darrel Carumba (BANAT NEWS)