Mihigda sa dalan naligsan patay

CEBU, Philippines - Patay ang usa ka giingong hubog human kini mohigda ug anha nakatulog tunga sa karsada dihang usa ka naghaguros nga motorsiklo ang miligis kaniya niadtong miaging gabii sa sitio Balatik, barangay Cawayan lungsod sa Dalaguete.

Ang namatay giila sa kapulisan nga si Reynaldo Belamala, nagpuyo sa nahisgutang lugar gideklarar nga dead-on-arrival sa mga doktor sa Eldefonso Alcantara Memorial Hospital sa nahisgutang lugar gumikan usab sa mga pangos ug mga bun-og niining naangkon.

Si PO2 Allan Sanoy sa Dalaguete Police Station nga gikahinabi sa Banat News nagkanayon nga usa ka Rex Gonzaga, 21, taga barangay Balisong lungsod sa Argao maoy nakaligis-patay kang si Belamala dihang kini misubay sa nahisgutang dapit aron mopauli na unta gikan sa usa sa mga lungsod sa habagatang bahin sa lalawigan sa Sugbu.

Matud pa ni PO2 Sanoy nga luwan si Gonzaga sa iyang motorsiklong Honda XRM nga nagtangag og plakang IM-4223 dihang wala niini mabantayi ang hubog nga biktima diha sa tunga sa kalsada natulog hinungdan nga nadasmagan niya kini ug nakaangkon og grabeng mga bun-og sa lawas.

Ang driver nga si Gonzaga gitanggong pa karon sa kapulisan sa Dalaguete human kini motahan human sa aksidente samtang gikatakda pa ang pag-atubang sa mga kabanay sa namatay, hinuon matud pa ni PO2 Gonzaga nga kagahapong adlawa ang uyoan sa namatay nga si Nanding Villahermosa mipadayag nga ilang husayon ang maong kaso ug dili nalang mokiha.

Apan ang mga ginikanan sa drayber nga si Gonzaga wala pa mopatim-aw sa kapulisan hinungdan nga posible karong Lunes pa siya mabuhian atol na unya sa ilang pormal nga pagsabot-sabot tali sa ilang mga kabanay.

Ang suspek mitug-an sa kapolisan nga wala gyud niini tuyoa ug ligsan si Belamala sanglit wala niya kini makit-i dayon nga diha kini mohigda sa dalan.

Wala hinuon matino sa kapolisan kun tinuyoan ba sa biktima ang paghigda sa dalan ug kun duna ba kini problema maong kini naghubog ug mihigda sa dalan. –BANAT NEWS