Minor di baligyaa'g spray paint

CEBU, Philippines - Gipangamahanan ni Provincial Board (PB) member Juan Bolo ang usa ka resolusyon nga nag-awhag sa tanang mga Local Government Unit (LGU) dinhi sa Sugbu sa pag-umol og ordinansa nga magdili sa mga tindahan pagbaligya og spray paint sa mga minor de edad.

Matud pa ni Bolo nga ang iyang buhatan nakadawat og ubay-ubay nga reklamo labot sa naghitak nga vandalism dili lamang dinhi sa siyudad kundili bisan na sa probinsiya.

Ang mga reklamo nagtumbok nga sagad mamandal o magsuwat-suwat sa mga pader ug bongbong sa mga edipisyo mao ang mga minor de edad nga mogamit og spray paint.

 Matud pa ni Bolo ang mga lokal nga mga opisyal sa mga kalungsoran makahimo sa pagsumpo sa maong problema pinaagi sa pagpasar sa ordinansa nga magdili sa mga tindahan sama sa mga hardware sa pagbaligya og spray paint ngadto sa mga minor de edad.

Gisugyot ni Bolo nga tugutan lang nga makapalit og spray paint ang mga minor de edad kun may pagtugot sa mga ginikanan o sertipikasyon    gikan sa eskuylahan o sa barangay, simbahan, police or sa hepe sa barangay tanod.

Midugang si Bolo nga gikinahanglan ang maong ordinansa magtangag og silot ngadto sa mga tindahan o minor de edad nga masakpan sa akto nga mamaligya o kaha maghupot og spray paint.

 Silotan usab ang maaktohan nga namandal pinaagi sa paglimpyo sa koral ug pamultahon og P5 mil matag usa.   (Chester Abadilla)   (BANAT NEWS)