CEBU, Philippines - Usa ka mag-uuma naghikog patay pinaagi sa pagbitay og pisi sulod sa iyang balay didto sa barangay Altavista, lungsod sa Poro, isla sa Camotes niadtong Huwebes sa buntag.
Ang biktima mao si Dalumpines Montes, hingkod, ug usa ka mag-uuma nga taga Altavista.
Ang anak niini nga si Emiliano Montes Jr. mao nay mipahibawo sa mga polis sa maong hitabo.
Ang batan-ong Montes mitug-an sa kapolisan nga didto sa sulod sa ilang lawak makit-i nila ang iyang amahan nga wala nay kinabuhi kansang liog gihiktan og pisi nga nylon kansang pikas tumoy gigaid sa ilang sagbayan ug nagbitay kini nga nagdiwalwal na ang dila.
Subay sa inisyal nga imbistigasiyon sa kapulisan, nasuta nga naghikog gyud ang biktima apan wala pa matumbok sa mga kabanay ang posibling hinungdan niini.
Ang municipal health officer sa San Francisco nga si Dr. Galileo Velasquez misuway og susi aron pagtino kun may foul play ba ang kamatayon sa biktima, apan wala kini mahinayon dihang pag-abot niya sa crime scene, nasuta nga gi-usab na sa mga kabanay ang pagkabutang sa biktima. (Darrel A. Carumba) (BANAT NEWS)