Drugtest sa mga bombero ok ra
CEBU, Philippines - Gihangop ni Cebu City Fire marshal Supt. Esmael Codilla ang lakang sa Department of Interior and Local Government (DILG) pagpaubos usab sa mga personnel sa Bureau of Fire Protection (BFP) sa random drug test.
Mas labaw nga gihangop ni Codilla ang “one strike policy” nga ipatuman sa DILG nga magtangtang dayon sa BFP personnel nga mapamatud-ang adis-adis.
Kahinumduman nga niadtong 2004, gipaubos sa kinalit nga drug test ang mga sakop ni Codilla ug duha niini ang napositibo sa paggamit og shabu.
Apan matud sa fire marshal nga iya lang gipa-rehabilitate ang duha ug dayon gipabalhin gawas sa dakbayan.
Ang nahisgutang kinalit nga drug test natigayon tungod sa paninguha ni Codilla mugna usab sa iyang pagduda nga dunay adis-adis sa fire department.
Nagdumili na hinuon pagbutyag ang fire marshal duna siya’y gidudahan apan miingon si Codilla nga iyang gihangop ang lakang sa DILG aron pagsiguro nga luwas ang iyang buhatan sa illegal drugs.
Alang kang Codilla nga walay luna diha sa Cebu City Fire Department ang mga bomberong adis-adis.
Ang Cebu City Fire Department dunay 213 ka personnel, 136 niini ang firefighters samtang ang uban staff ug dunay laing trabaho. (Elly Bolonos) (BANAT NEWS)
- Latest
- Trending
