Mga tanom Marijuana gipangibot

CEBU, Philippines - Sobra sa usa ka gatus ka mga punoan sa Marijuana nga hapit nang anihon nasakpan ug gipang-ibot sa kapulisan sa bukirang bahin sa barangay Liboron lungsod sa Carmen gibanabanang 25 kilometros ang gilay-on gikan sa Poblacion kagahapon sa alas 7:00 sa buntag.

Gibutyag ni Insp. Carlos Reyes Jr., hepe sa Carmen Police dihang nahinabi sa Banat News nga mga sakop sa Barangay Intelligence Network maoy mihatag kanila sa impormasiyon bahin sa maong plantasyon hinungdan nga gilusad nila ang maong operasyon.

    Ang kapolisan milarot sa 114 ka mga punoan wala pay labot sa mga bag-ong gitanom nga mga Marijuana.

Ang dapit gitamnan lisod taakon sumala pang Reyes tungod kay di kini daling tultulon gawas nga bukid kaayo gibutang pa gyud kini taliwala sa dagkung kakahoyan.

Wala hinuoy nadakpang tag-iya o caretaker niini tungod kay gawas nga kaadlawon pa gilusad ang operasyon sa kapulisan layo usab kaayo og mga panimalay ang maong lugar.

Dili layo sa dapit nga gitamnan ang laing luna nga gihawanan nga gituuhang tamnan usab og susamang tanom.   (Darrel Carumba)   (BANAT NEWS)