CEBU, Philippines - Gisugdan na sa Overseas Workers Welfare Association pagpanghatag kagahapon sa tag P50,000 nga cash ngadto sa 14 ka nawagtanga’g trabahong mga Overseas Filipino Workers (OFW) kansang business proposal nakapasar sa screening.
Sa gihimong public consultative meeting kagahapon diha sa Malacañang sa Sugbu nga gitambongan sa dili mominus 160 ka OFW’s OWWA gihatag sa unang batch nga beneficiaries ang ilang Filipino Expatriate Livelihood Support Fund.
Si OWWA administrator Carmelita Dimzon maoy nangulo pag-release sa mga tseke uban sa iyang luyo-luyong si Teresita Manzala ug regional director Wilfreda Misterio.
Ang 14 ka OFW nagplanong magsugod na sa ilang negosyo dinhi sa Pilipinas human sila gipangtaktak sa tagsa-tagsa nila ka trabaho didto sa laing nasud apan kasagaran kanila gikan sa Taiwan.
Matud ni Dimzon nga ang maong salapi susama og loan nga bayran sulod sa duha ka tuig ug dunay interes nga 5 porsiyento per annum kun matag tuig ug laing 90 ka adlaw nga grace period kun lugway.
Si Lileth Catibod kinsa usa sa mga beneficiaries niini kinsa bag-o lang naabot dinhi gikan sa Taiwan niadtong buwan sa Enero human nagtrabaho didto isip factory worker sa pabrika og semi-conductors sobra usa ka tuig.
Matud ni Catibod dako niyang kalipay tungod kay magsugod na siya pagpabarog sa iyang sari-sari store sa ilang lugar sa siyudad sa Carcar samtang ang 13 niini susama usab og planong magtukod og tindahan ug boarding houses.
Matud ni Dimzon, ang OWWA migahin og P100 million aron ipahulam sa mga OFW .
“All those displaced Overseas Filipino Workers who would like to avail of the program, you can borrow a maximum of P50,000. Just pass your business proposal, and undergo the business counseling and entrepreneurial training,” pasabot pang Dimzon.
“More than 100 displaced OFW’s in the country have already received their loan and only takes two days for the processing of papers before giving out the loan,” dugang pa niya. (Rey Pasaporte) (BANAT NEWS)