Hardware did-an pagbaligya'g pintal

CEBU, Philippines - Mibahad ang kagamhanan sa dakbayan sa Mandaue sa pagpahamtang og silot sa mga tagdumala sa mga tindahan sa hardware nga mobaligya og pintal ngadto sa mga batan-on ilabi na kun kini adis-adis.

Kini basi sa usa ka ordinansa nga gituki sa konseho sa Mandaue nga nagtumbok nga ang pintal gikan sa mga hardware, maoy gigamit sa mga adis-adis sa pagpamandal sa mga pader ug bongbong sa mga edipisyo diha sa dakbayan.

Matud pa ni Bise Mayor Carlo Fortuna nga sa higayong ikapasar na ang maong ordinansa , did-an na ang mga hardware sa pagbaligya og pintal ngadto sa mga batan-on.

Gipasabot ni Fortuna nga kasagaran sa mamandal kun magsuwatsuwat sa mga pader ug mga bongbong mga tigamit usab og ginadiling drugas.

Busa matud pa ni Fortuna nga imbis ang maong mga batan-on maoy silotan, mas maayo pang mga tagdumala sa hardware maoy pitolon aron masulbad ang suliran bahin sa “vandalism” diha sa dakbayan.

Gidasunan usab kini ni konsehal Emiliano Rosal sa maong dakbayan kinsa nagkanayon nga kasagaran sa makalapas sa unang higayon silot nga multa ray ipahamtang niini.

Apan kun moabot na og ikatulong paglapas, ang pagpatak-op sa tindahan ug pagpapriso sa mga tagdumala niini maoy sagubangong silot sa malapason, matud pa ni Rosal. (Romeo Limpangog)    (BANAT NEWS)