Pagpalutaw sa barko sa Hapones gihimakak

CEBU, Philippines - Gihimakak sa tsirman sa Talisay City Fisheries and Aquatic Resources Management Council (CFARMC) nga si David “Boy” Odilao nga mihatag siya og pagtugot ngadto ni bisan kinsa sa pagpalutaw og balik barko sa Japanese Imperial Navy nga nalunod niadtong World War II diha sa kadagatan sa barangay Poblacion, dakbayan sa Talisay.

Si Odilao nagkanayon nga siya ug ang iyang anak nga si Konsehal Bernard Odilao kinsa maoy gipasanginlang nalambigit sa maong isyu nagkanayon nga wala sila mohatag og pagtugot ni bisan kinsa ug dili gyud sila mohatag og pagtugot sa pag-retrieve sa maong barko.

Ang batan-ong Odilao mao ang tsirman sa komitiba sa kalikupan diin ang CFARMC nasakop.

Ang amahan nga Odilao kinsa kanhi Custom District Collector nagkanayon nga wala silay plano nga makuha ang nahisgutang barko gikan sa nahimutangan niini karon tungod kay supak kini sa mga lagda CFARMC.

Matud usab niini nga isip usa ka auxiliary nga miyembro sa Philippine Coasrguard (PCG) nakahibawo siya sa mga balaod sa pagprotekta ug pagpreserba sa marine environment.

Gikataho nga ang nahisgutang nalunod nga barko usa ka supply ship sa mga Hapones ug gituuhang dunay mga mahalong butang o bisan unsang kabtangan nga nauban pagkalunod sa gilawmong 60 ka tiil.

Gikan sa Larawan Beach, barangay Poblacion tulo ka minuto lang ang dagan sa pumpboat aron maabot sa lugar nga nalunoran sa barko.

Ug ang mga divers lang sa nahisgutang lugar usa na niini si Anthony “Bong” Nator ang nakahibalo ang unang nakahibawo nga dunay nalunod nga barko sa Hapon sa maong lugar.

Gikataho nga si Odilao maoy mihatag og instruction kabahin sa retrieval operation sa barko.

Si Nator maoy gi-deputize ni Konsehal Shirley Belleza aron pagbantay sa sanctuary sa Lagundi Reef diin ang maong lugar usa lang ka metro ang gilay-on nahimutangan sa barko.

Si Belleza ang mihimakak nga duna siya’y kalambigitan sa planong pagkuha sa maong barko.

Nagkanayon kini nga palabihon pa niyang ampingan diha sa nahimutangan ang maong kabalin sa World War II alang edukasyon ug mahimo usab kining bisitahon sa mga turista. (Brenda Batuto)   (BANAT NEWS)