Mag-uuma gibuk-an sa ulo

CEBU, Philippines - Patay nang nakit-an ang usa ka mag-uuma human gibuk-an sa iyang ulo human giatngan sa dalan ug gipusil samtang paingon na kining mopauli gikan nga naghipos sa iyang kabaw nga gitugway sa umahan sa barangay Gaas, lungsod sa Balamban niadtong Lunes sa alas 7:25 sa gabii.

Ang biktima nga nagbuy-od na sa kaugalingong dugo nga naabtan sa kapolisan diha sa dalan ug wala nay kinabuhi mao si Nestorio Tejero, 56 anyos, minyo, molupyo sa Sitio Mayana sakop sa nahisgutang barangay ug usa ka mag-uuma.

Gibutyag ni SPO2 Cesar Climaco sa Balamban Police Station sa dihang nahinabi sa Banat News subay sa blotter nga gibasehan niini ang biktima gikan pa sa iyang umahan nianang pagka adlawan ug niadtong higayona paingon na unta kining mopauli dala ang gitugway nga kabaw niini.

Apan giatngan kini sa suspek sa libon nga lugar ug gipusil   sulod sa tulo ka higayon sa gibanabanang 50 metros ang gilay-on gikan sa pinuy-anan niini ug tungod sa kangitngit sa maong lugar walay bisan usa ka mga silingan niini nakakita sa mamumuno gawas lang sa sunod sunod nga boto sa armas.

Ang kapolisan naka-recover og armas nga .22 magnum nga puno sa mga bala ang chamber niini nga giluklok sa hawakan sa biktima ug usa ka sundang nga dunay sakuban nga gitakin sa tuong hawakan sa biktima. (BANAT NEWS)