Nadasmagan sa Librando patay

CEBU, Philippines - Patay nang nahidangat sa tambalanan ang usa ka ginang human kini madasmagi sa usa ka bus pasaheroan didto sa Sitio Lipata barangay Linao lungsod sa Minglanilla niadtong Lunes sa buntag.

Ang biktima mao si Nalyn Sarabia, 28 , minyo, ug lumad nga taga lungsod sa Sta Fe, isla sa Bantayan apan kasamtangang nagpuyo sa barangay Linao siyudad sa Talisay ug dunay usa ka anak.

Samtang ang nakadasmag kaniya mao ang Librando bus nga gimaneho ni Eduardo Gutiao, hingkod, nga taga barangay Lawaan lungsod sa Dumanjug.

Si PO3 Allen Garciano sa Minglanilla Police Station mibutyag sa Banat News nga ang Librando bus nagpaingon sa siyudad sa Sugbo gikan sa habagatan dihang paghiabot niini sa highway sa Linao, kalit lang milabang sa karsada ang biktima hinungdan nga nadumbolan kini sa simod sa sakyanan ug nalagpot ug sa pagtugpa niini, didto malamba ang ulo sa sementadong karsada nga maoy hinungdan nga dead on arrival sa paghiabot niini sa Minglanilla District Hospital.

Samtang ang drayber boluntaryong mitahan sa iyang kaugalingon sa kapulisan ug nagpaabot sa tukmang kaso nga ipasaka batok kaniya. (Darrel A. Carumba)   (BANAT NEWS)