Bill ni Enrile giuyonan ni Alix

CEBU, Philippines - Gihangop ni Cebu City Councilor Christopher Alix ang balaudnon nga gipalabang ni senador Juan Ponce Enrile nga magkontrol sa mga herbal drugs ug mga food supplements.

Ang Senate Bill 3075 ni Enrile gituohan sa konsehal nga maoy maghatag og kinutoban sa mga herbal medicine ug dietary food supplements nga nagbaha sa merkado.

Gipadayag ni Alix nga bisan kung mahinungdanon karon ang paggamit sa alternatibong mga medisina apan dili usab mahimo nga ikompromiso ang kahimsog sa panglawas sa tawo.

Kini tungod sa pagduda ni Alix nga kadaghanan sa mga herbal ug food supplements nga gipamaligya sa nagkadaiyang tindahan wala moagi og testing sa ahensyang hingtungdan.

Ang balaudnon ni Enrile magsilot niadtong mopagawas og marketing promotions nga magpatuo sa mga konsumidor nga makaayo ang ilang food supplements.

Kini bisan pa man kung tataw sa label niini ang gibutang nga disclaimer nga wala pa kapamatud-i nga makaayo sa bisan unsang sakit.

Nalatid usab sa gisugyot nga panukdanan sa senador nga gidili ang pagpanghimo o pagbaligya sa mga herbal medicine ug food supplements nga misbranded o substandard.

Dunay silot nga pagkabilanggo nga mokabat sa lima ka tuig o multa nga dili mominus sa usa ka libo ka pesos alang sa mga makalapas sa maong balaudnon.

Matud ni konsehal Alix nga kung maaprobahan ang maong balaudnon, maglisod na unya pagpangilad ang ubang namaligya og herbal medicine ug food supplements. (Elly Bolonos)   (BANAT NEWS)