City jail dunay watchlist

CEBU, Philippines - Duna nay kaugalingong watchlist ang Cebu City Jail sa mga dalaw nga gidudahang maoy tigpayuhot og ginadiling drugas diha sa nahisgutang bilanggoan.

Kini maoy gibutyag sa warden sa City Jail nga si Supt. Efren Nemenio human usab masikop ang pipila ka mga dalaw nga nagdala og ginadiling drugas.

Matud ni Nemenio nga ang labing ulahi nga nasakpan sa mga jailguard mao ang usa ka Carmela Menchavez nga nagtingkagol na karon sa bilanggoan.

Ang suspetsado miduaw sa iyang kapuyo nga nabilanggo apan sa dihang kini gipahubo sa babayeng gwardiya ug girikisa, nakita ang misiwil nga plastik diha sa kinatawo niini.

Paghulbot pa sa gwardiya sa plastic, kini giingong dunay sulod nga duha ka medium pack sa gituohang shabu, cellphone, ug ubang gidili nga butang sa bilanggoan.

Nagkanayon si Nemenio nga si Menchavez nalakip sa ilang mubo nga listahan nga nakuha gikan sa intelligence report.

“Naa na man tay watchlist mao ning gipabantayan nato og maayo, nadakpan gyud si Menchavez nga usa sa naa sa atong listahan,” sumala ni Nemenio.

Pito lang hinuon ka dalaw ang anaa sa watchlist sa Cebu City Jail apan nagtoo si Nemenio nga duna pay pipila niini nga wala nila mahibaw-i.

Kini ang hinungdan nga kanunay’ng gipahinumduman sa warden ang iyang mga sakop sa higpit nga pagbantay sa mga bisita.

Malaumon si Nemenio nga ang uban nga anaa sa ilang listahan maaktuhan ra sa mosunod nga mga adlaw ug sama kang Menchavez mabalhog usab diha sa City Jail.

Nasayran nga sukad niadtong miaging buwan, muabot na sa siyam ka mga tawo ang napasakaan og kaso sa mga opisyal sa nahisgutang bilanggoan.

Kini tungod sa giingong pagsuway og payuhot og ginadiling drugas diha sa Cebu City Jail apan walay swerte kay pulos nasakpan sa mga gwardiya. (Elly Bolonos)   (BANAT NEWS)