Mga tsinelas gisunog ni titser

CEBU, Philippines – Gikompirmar sa prinsipal sa Guadalupe Elementary School nga si Ginang Victoria Mansueto nga usa sa iyang magtutudlo   mipasunog sa tanang mga tsinelas sa iyang mga tinun-an sa grade six sa maong tunghaan sa milabay’ng bulan sa Disyembre tuig 2008.

Base sa reklamo nga miabot sa DyHP ug Banat News gikan ni Ester Cabato usa ka ginikanan sa usa ka tinun-an sa grade 6 nga wala na kini maka-eskwela og padayon ang iyang anak gumikan sa kahadlok sa iyang magtutudlo nga si Ginang Estrella Labra, ang Grade 6 adviser sa maong bata.

Matud pa ni Cabato nahadlok ang iyang anak gumikan sa kasuko ni   Labra ngadto kanilang mga tinun-an sa dihang nadakdak kini sa ilang pultahan gumikan sa mga tsinelas nila nga nagpasad sa ganghaan sa ilang classroom.

Gumikan niini, mipauli silang tanan nga nagtiniil nalang human nga mimando si   Labra nga isulod sa sako ang tanang mga tsinelas ug sapatos aron sunogon.

Gumikan niini, gibati og kahadlok ang bata ug wala na kini mopadayon sa pagtungha hangtod ning pagsuwat diin gibasol ni Cabato si Labra sa nahitabo sa iyang anak.

Si Ginang Victoria Mansueto, ang prinsipal sa Guadalupe Elementary School nga nahinabi sa Banat News mipadayag nga matuod ang maong reklamo ni Cabato apan walay kamatuoran nga nagtiniil ang mga bata sa pag-uli niini sa ilang tagsatagsa ka panimalay.

Sa dihang gipatawag ni Mansueto si Labra, miangkon kini sa iyang nahimo nga pagsunog sa maong mga tsinelas sa mga bata apan gipasabot ni Labra nga kadto lamang mga tsinelas nga ilang gikonsiderar nga "working sleepers" ug dili ang mga sapatos ug tsinelas nga gigamit sa iyang mga tinun-an gikan sa ilang panimalay ngadto na sa ilang tunghaan.

Ang maong mga tsinelas gamiton lamang sa ilang mga kalihukan sama sa gardening, pagpanglimpiyo sa palibot aron dili magkalapok ang ilang mga sapatos ug orihinal nga tsinelas.

Matud pa ni Mansueto nasuko si Labra sa iyang advisory class gumikan kay nagpasad sa ganghaan sa ilang lawak saringan ang mga tsinelas sa mga bata hinungdan nga na-slide kini ug nadakdak diin hapit usab kini mahulog sa kanal.

Gumikan sa kasuko ni Labra nga walay miangkon sa mga tinun-an sa maong mga tsinelas gipasulod niya kini sa sako ug gipasunog ang mga "working sleepers" ug walay labot ang mga sapatos.

Samtang si Mansueto mipadayag nga sayop ang gihimo sa iyang magtutudlo ug iya na kining gipahimangnuan nga dili na kini usbon ngadto sa iyang mga tinun-an.

Samtang giawhag usab ni Mansueto si Cabato nga mopatim-aw sa iyang buhatan aron katabangan kini sa iyang reklamo ug problema. -BANAT NEWS