Mga beterano nangalipay

CEBU, Philippines - Gikalipay sa mga Beterano sa World War II ang pagpirma sa presidente sa Amerika sa “American Recovery and Reinvestment Act of 2009” niadtong Pebrero 17, 2009.

Ang maong balaod nagtugot sa pagpagawas og one-time lump-sum ngadto sa mga lehitimong Pilipinong Beterano sa WWII diin ang kagamhanan sa Amerika migahin og $198 milyones alang niini.

Ang uban nabalaka nga kun mo-aplay sila sa maong benepisyo maapektuhan ang ilang ubang mga benepisyo.

Apan gitataw sa maong balaodnon nga dili maapektuhan ang ubang mga benepisyo sa mga beterano kung mo-aplay sila sa maong benepisyo nga gihatag sa Amerika.

Si Retired Colonel Leonardo Abalo Sr., 88-anyos nga taga barangay Poblacion, dakbayan sa Talisay, District Commander 1st Cebu Veterans District ug miyembro sa Veterans Supreme Council nagkanayon nga gikalipay nila ang maong pag-ila kanila sa kagamhanan sa Amerika ug paghatag ngadto kanila og benepisyo.

Matud niini nga sukad pa niadtong tuig 1946 silang mga beterano nakigbisog nga makadawat og benepisyo gikan sa Amerika tungod sa ilang pag-ayuda sa mga Amerikanhong sundalo nga mianhi sa nasud pagpakig-away ngadto sa mga sundalong Hapon.

Gibutyag ni Abalo nga sa dihang miduso sila sa ilang mga yangungo ang Amerika mipagawas og “Rescission Act” nga nag-disqualify sa mga beterano ug wala   ilha isip mga sundalo sa Amerika.

Dako kaayo ang ilang paghangop   tungod kay sa kadugay sa panahon sa ilang pagpakigbisog gidungog na gyud ang ilang hangyo. – BANAT NEWS