Pagtunga sa 2nd district aprobado na sa plenaryo

CEBU, Philippines - Naaprobahan sa 3rd and final reading sa House on Plenary Session ang balaodnon nga gipanday ni Kongresista Pablo Garcia nga nagtunga sa ikaduhang distrito.

Matud pa ni Kongresista Antonio Cuenco nga ang maong   balaodnon ni Garcia nalakip na sa mga balaodnon sa Ubos Balay Balaoranan nga na-transmit na nila ngadto sa Senado.

Gani naabot na kini sa Senate Committee on Local Government nga gipamunoan ni Senador Aquilino Pemintel.

Gipasabot ni Cuenco nga matuman ang gusto ni Garcia nga matunga ang segundo distrito.

Ang usa ka distrito langkoban sa pito ka mga lungsod samtang ang laing distrito langkuban sa walo ka mga lungsod.

Si Cuenco nagkanayon nga dili gihapon magdugay sa Senado ang maong balaodnon tungod kay usa lamang kini ka local bill ug gipaabot nga makalusot kini   sa sunod nga bulan.

Dugang pa ni Cuenco nga sa higayon nga mapirmahan na ni Presidente Gloria Macapagal Arroyo mahimo na kining balaud ug makumpleto na ang pag-umol sa bag-ong distrito. – BANAT NEWS