CEBU, Philippines - Nasurpresa si acting Mayor Michael Rama sa desisyon sa korte pagpabuhi sa dinakpan sa kapolisan nga si Leonardo Jastiva Sr.
Si Jastiva nga usa ka Pastor sa International Missionaries Society of the Seventh Day Adventist Reform Movement gipasakaan og kasong Parricide.
Kini human itumbok sa kapulisan nga maoy utok sa pagpatay sa iyang asawa nga si Judith pipila ka semana na ang nakalabay.
Apan gipabuhian si Jastiva ni Judge Gabriel Ingles tungod kay giingong illegal ang pagdakop niini sa kapulisan tungod kay walay warrant of arrest.
Bugtong konswelo sa kapolisan tungod kay nagpabilin gihapon ang kasong parricide nga gisang-at niini batok sa suspetsado.
Gitataw hinuon ni Rama nga dili angayang lalison ang korte kun kini dunay igong sukaranan sa pagpagawas kang Jastiva sa bilanggoan.
Apan gustong masayod ang acting mayor gikan sa direktor sa kapolisan sa dakbayan nga si Sr. Supt. Patrocinio Comendador sa pagpalingkawas sa suspetsado.
“Atong pangutan-on kun unsay nahitabo, mangayo ta sa ilang side kun nganong napadung diha, nganong naingon ana,” sumala ni Rama.
Wala hinuon ikonsiderar sa acting mayor nga usa ka kapalpakan sa habig sa kapulisan ang pagbuhi sa ilang dinakpan nga si Jastiva.
Apan gitataw ni Rama nga gitudloan ug nasayod na ang kapolisan kung unsay ilang himoon kung duna kini dakpon nga suspetsado.
“Naa may training ana mao nga tan-awonon na, pero ang pinakaimportante nga let’s not focus on the palpak but focus sa tawo nga na-identify,” dugang pamahayag ni Rama.
Nasayran hinuon nga mahimo pang makapangayo og warrant of arrest ang kapulisan ngadto sa hukmanan alang sa pagdakop og balik kang Jastiva.
Apan posibleng kini maglisod na unya pagdakop sa suspetsado kun makahuna-huna pag-ikyas ang pastor ug dili na muatubang sa kaso nga gipasaka sa kapulisan. – BANAT NEWS