Koreano naghikog sa motel

CEBU, Philippines - Usa ka Koreano ang giingong naglisod na og bayad sa iyang bill sa usa ka motel nga gipuy-an diha sa dakbayan sa Lapulapu sa milabay'ng hapon.

Giila sa kapolisan ang maong langyaw nga si Chang Woo Kang, 45, nag-okupar sa room 89 sa maong motel.

Matud pa ni SPO1 Frederick Eslit sa Homicide Section sa Lapulapu Police Office tulo na ka bulang nagpuyo sa maong motel si Chang ug sa milabay'ng buntag mga alas 7:30 niadtong petsa 21 gitawgan kini sa motel supervisor aron paninglon sa iyang abang.

Apan gikatahong mihangyo kini nga unya na kung moabot ang iyang higalang Koreano. Gikatahong dunay kaubang uyab nga Pilipina si Chang nga nagpuyo sa maong lawak apan namatikdang nianang pagkasayo sa buntag nianang adlawa migawas kini ug wala na mobalik.

 Mga alas 4:00 sa hapon sa susamang adlaw gitawgan pag-usab sa management si Chang apan walay mitubag sa maong lawak sulod sa pipila ka higayon.

 Gumikan niini ang mga room attendants mipugos pag-abli sa maong lawak ug ilang nakita ang nagbuy-od nang lawas sa nagkadugong Koreano ug wala nay kinabuhi.

 Sa paghiling sa kapolisan sa lawas niini, duna kini samad pinusilan sa iyang ulo ug may kalibre .38 rebolber tupad sa tuong kamot niini nga maoy gidudahang gigamit pagdul-it pusil sa ulo sa langyaw.

Nagduda ang kapolisan nga posibleng naghikog kini tungod sa nakitang ‘suicide note’ diha sa lawak nga gisuwat sa sinultihang Korean ug dihang gihubad sa usa ka interpreter kini nagkanayon “I’m sorry brother, I don’t want to live anymore.”

Mipadayag ang mga empleyado sa maong motel nga wala silay nabating buto sa armas gikan sa maong lawak pipila ka oras sa wala pa madiskubrehi ang patay'ng lawas niini.

Gawas pa niini wala say nakitang timailhang dunay nahitabong komosyon sa sulod tungod kay wala magkaguliyang ang mga butang sa maong lawak.

Ang .38 rebolber dunay usa ka basiyo ug upat ka buhing bala diha sa tambor niini. Buot sa kapolisan nga i-paraffin test ang kamot sa langyaw pagtino kung siya bay nipabuto sa armas diha sa tupad niini gawas sa awtopsiyang himuon sa patay'ng lawas niini. – BANAT NEWS

May 12 Bigtime Drug syndicate sa rehiyon

Ni Guam Logrono

CEBU, Philippines - Si Rep. Antonio Cuenco sa Cebu City South District mibutyag nga adunay 12 ka sindikato sa illegal drugs nga naglihok dinhi sa Metro Cebu ug naglihok sa tibuok Rehiyon Siyete.

Kini maoy gibutyag sa kongresista atol sa pagbisita ni Dangerous Drugs Board chaiman Vicente “Tito” Sotto III nga miduaw dinhi sa Sugbu sa milabay'ng adlaw.

Matud pa ni Cuenco nga ang maong mga bigtime syndicates taud-taud nang nag-operate sa rehiyon ug gimonitor sa mga tinugyanan sa Philippine Drugs Enforcement Agency (PDEA-7).

Miawhag si Cuenco sa PDEA-7, National Bureau ug Philippine National Police paghiusa aron mapuhag ang grupo.

Atol usab sa tigom gituki ang paghulma sa Regional Inter-Agency Action Group (RIAG-7) nga maoy tahasan sa paggukod niadtong mga tawo ug grupong nalambigit sa ginadiling drogas.

Kini subay sa bag-ong kamanduan ni Presidente Gloria Macapagal Arroyo kinsa mideklarar sa iyang kaugalingon isip ‘anti-drug czar’ dinhi sa nasud sa tinguhang mapupos ang illegal nga drugas sa tuig 2010.

Samtang subay niini si Regional State Prosecutor Fernando Gubalane mitug-an nga adunay 10 ka mga dagkong kaso sa ginadiling drugas nga una nang nabasura sa korte ang iyang gibuksan pagbalik. – BANAT NEWS