CEBU, Philippines - Founding Chairman sa Citizen’s Drug Watch nga si kanhi Senador Ernesto "Boy" Herrera miawhag sa tanang mga magtutudlo nga maoy mounang mopaubos sa random drug testing una pa ang ilang mga tinun-an.
Matud pa ni Herrera angayang ang mismong mga magtutudlo maoy mahimong sumbanan sa mga estudyante.
Kini tungod kay matud pa niya dili ikalimod nga duna usab mga magtutudlong tiggamitan og ginadiling drugas ug duna pay tigpayuhot niini.
Si Herrera mipadayag nga kuwang lang gihapon ang paningkamot sa kagamhanan sa maong drug testing kung walay lakang ug suporta nga paghimoon sa mga tinun-an nga masutang positibo sa paggamit sa illegal nga drugas.
Gitandi ni Herrera ang iyang gihimo kaniadto nga pagtukod sa 47 ka mga rehabilitation centers lukop nasud aron matabangan ang mga adik nga mabalik sa ilang normal nga kinabuhi pagbiya na sa maong bisyo.
Matud ni Herrera nga kung dunay lakang sa pagsusi sa mga tinun-an nga nalambigit sa illegal nga drugas kinahanglan aduna say lakang sa pag-rehabilitate kanila inay silotan. – BANAT NEWS