Tanod masakiton naghikog

CEBU, Philippines - Gumikan sa balatian sa lawas nga wala kapatambali sa hospital kay walay kuwarta nga ikabayad, ang hepe sa barangay tanod sa barangay Binaobao, lungsod sa Bantayan naghikog patay sa miaging hapon.

Siya mao si Roldan Jimenez Despi, 36, ulitawo nga taga Binaobao kansang liog gihiktan og pisi nga ang tumoy sa maong pisi gigaid sa sagbayan sa iyang lawak.

Sumala sa kapolisan sa maong lungsod nga mipatong og lamesa ang biktima unya milukso kini, busa wala na makatugkad ang mga tiil sa sawog ug nabitay siya nga maoy hinungdan sa pagkatuok sa liog ug nabugto ang iyang kinabuhi.

Ang inahan sa biktima nga si Teresa Despi mibutyag sa kapolisan nga sa wala pa mahitabo ang paghikog, nagdungan pa sila og pangaon unya ang biktima kalit lang misulod sa iyang kwarto.

Midugang ang inahan nga may sakit ang biktima, (pero wala niya ibutyag kun unsang sakita) apan wala kapatambali tungod kay walay kuwarta.

Hinuon walay nakitang foul play ang kapolisan sa kamatayon sa maong tanod. - Lesley Caminade (BANAT NEWS)