Student drug test Martes na - Sotto

CEBU, Philippines - Si kanhi Senador Tito kinsa maoy chairman sa Dangerous Drugs Board (DDB) mibutyag kagahapon nga sugdan na sa pagpatuman ang random drug testing sa mga estudyante sa dakbayan sa Mandaue karong Martes , samtang Miyerkules usab ang taga dakbayan sa Sugbu.

Sa usa ka press conference nga gipahigayon kagahapon sa buntag sa balay ni Kongresista Antonio Cuenco sa habagatang distrito sa dakbayan sa Sugbu gitin-aw ni Sotto nga walay katungod ang taga Department of Education (DepEd) sa pagpahamtang og silot sa mga estudyante nga mapalgang positibong tiggamit og   ilegal nga drugas.

Matud pa niya nga pasagdan ang usa ka estudyante sa iyang pagtuon ug anaa na sa mga ginikanan niini kun ila bang ipaslak sa rehabilitation center o dili.

Kini samtang ang taga Department of Health maoy mipasalig nga maoy mogama og centro sa rehabilitasyon alang sa mga estudyante nga tiggamit og illegal nga drugas.

Sa laing bahin si Undersecretary Clarence Paul Oaminal sa DDB nagkanayon nga wala sila’y nakitang babag sa maong programa nga gigahinan sa kagamhanan og P10 milyones sa tibuok tuig.

Matud pa niya nga ang maong programa nga gipangunahan ni Presidente Gloria Macapagal Arroyo himoon sa tanang tulunghaang high school sa nasud sa tibuok tuig ug sa matag tuig gikan karon.  - BANAT NEWS