Nipuga napusilan

CEBU, Philippines - Usa ka piniriso ang napusilan human gikatahong misuway og eskapo kauban sa laing piniriso human sa panihapon sa karsel sa Bureau of Jail Management and Penology (BJMP) sa siyudad sa Carcar niadtong Biyernes sa alas 6:00 pasado sa gabii.

Ang nakaangkon og samad pinusilan sa walang paa mao si Agustin Lauron, 29, nagpuyo sa barangay Dapda sa nahisgutang siyudad nga nabilanggo niadtong petsa 24 bulan sa Hunyo tungod sa pagpayuhot og ginadiling drugas.

Gibutyag ni JO3 Pidie Hetalaga sa Carcar BJMP nga nahinabi sa Banat News nga si Lauron ug Adonis Responso, may kasong frustrated murder, nagsunod kang Lauron nga maoy nagdala sa kaldero nga gisudlan sa ilang rasyon sa panihapon paingon sa gawas sa selda.

Pag-abli sa pultahan kalit nga gidasmagan sa duha si JO1 Archie Sayon ug nisutoy og dagan paingon sa gawas apan nagunitan niini si Responso.

Matud ni JO3 Hetalaga nga dihang paingon nang mogawas sa ikaduha ug maoy katapusang gate sa bilanggoan si Lauron iyaha nalang kining gipusil sa walang paa aron dili maka-eskapo.

Apan bisan samaran nakadagan pa og 200 metros si Lauron ug nakatago sa libon hinungdan nga nangayo og backup ang BJMP sa kapulisan sa Carcar ug gisubay ang luyo sa bilanggoan.

Si Lauron nasakpang niluklok sa mga libunan ug daling gidala sa Carcar City District Hospital.

Ang jailwarden nga si Sr. Insp. Benjamin Oira nimando og dinaliang imbestigasyon sa mga jailguard on duty nga sila si JO3 Hetalaga, JO1 Jamael Palantig ug JO1 Archie Sayon.

Gisuspenso usab ang prebilihiyo sa dalaw sa maong bilanggoan, samtang nasuta nga ang hinungdan sa pagsuway og ikyas ni Lauron mao ang tumang kamingaw sa asawa kay wala na siya duawa niini. - BANAT NEWS