'Tambalan' gi-ambush patay

CEBU, Philippines - Patay nang nahilandig sa tambalanan ang usa ka ‘tambalan’ human gipusil samtang naglakaw sa sitio Bas barangay Perrelos siyudad sa Carcar niadtong Biyernes sa ala-1:45 sa hapon.

Ang biktima mao si Placedo Belila, 67, lumad nga taga barangay Esperanza lungsod sa Aloguinsan samtang duha ka mga lalaki nga nagsakay og motorsiklo maoy gitumbok nga mipusil sa biktima.

Matud pa ni PO1 Renido Villaraiz sa Carcar City Police dihang nahinabi sa Banat News samtang naglakaw si Belila kalit siyang gihunongan sa mga gikatahapang sakay sa kolor itom nga motorsiklo ug ang angkas sa luyo mipusil kaniya tulo ka higayon.

Ang biktima nakaangkon og samad pinusilan sa ulo ug paa, gidala sa Carcar City district hospital apan gideklarar kining patay na.

Dugang nahipos nga impormasyon sa kapulisan nga mianha ang biktima sa lugar tungod kay dunay magpatambal kaniya.

Ang kapulisan padayun pa sa ilang imbestigasyon pagtumbok sa suspek ug sa motibo sa krimen.  - Darrel Carumba (BANAT NEWS)