Caretaker sa internet gigapos sa tulisan

CEBU, Philippines - Usa ka internet café ang gitulis ug gigapos ang caretaker diha sa Santa Lucia Cabankalan II, barangay Bulacao, Pardo pasado alas 2 sa kagahapon sa buntag.

Si Eugene Kilabkilab, 17, lumad nga taga Negros Oriental naabtan sa iyang amo nga si Rommie Kana, 39, lumolupyo sa sitio Ilang-ilang barangay Lagtang syudad sa Talisay nga duna nay gapos sa duha ka mga kamot ngadto sa lingkuranan ginamit ang usa ka pisi.

Matud pa sa biktima lima ka wa mailhing lalaki nga misulod sa ilang internet café ang kalit nga mition kaniya og armas dayong deklarar og tulis.

Si Kana midangop sa kapolisan pasado alas-4   kagahapon sa buntag aron ipa-blotter ang nahitabo.

Gikatahong nahibulong si Kana tungod kay wala tubaga ni Kilabkilab ang iyang tawag sa telepono maong iyaha kining gisusi, matud pa sa pag-abot niya pawong ang mga suga ug dihang iyang gisusi nakugang siya nga gihiktan na ang iyang caretaker.

Giguba sa mga tulisan ang computer nga hulog-hulogan og piso ug gidala ang gibana-banang P30 mil nga sulod niini, gikuha usab sa mga tulisan ang P1,300 cash ug cellphone sa biktima.

Si PO3 Edmund Tiempo nga nahinabi sa Banat News miingon nga posibleng taga diha ra usab ang mga tulisan gumikan kay nasuhito naman sa operasyon kung kanus-a mingaw ang maong internet café.  - Lesley Caminade (BANAT NEWS)