Lolo dasmagan sa bus patay

CEBU, Philippines - Namatay ang usa ka 79 anyos nga lolo dihang nadasmagan kini sa usa ka bus pasahero-an didto sa highway sa barangay Palanas lungsod sa Alcantara niadtong Huwebes sa alas 3:00 sa hapon.

Ang biktima mao si Simplicio Juarez, 79, ulitawo nga taga Palanas, samtang ang drayber sa Librando Bus Liner nga nakadasmag kaniya mao usab si Alejandro Asatempo, 34 , minyo ug wala pay klarong address.

Si SPO1 Pelayo Templado sa Alcantara Police Station mibutyag sa Banat News nga ang Librando bus gikan sa lungsod sa Badian nga nagpaingon sa dakbayan sa Sugbo.

Apan sa pag-abot niini sa Palanas, kalit lang milabang sa karsada nga walay lingi-lingi ang biktima ug gumikan sa kaapiki na, na-atrasawo na sa pag-aplay og brake ang drayber hinungdan nga nadasmagan kini.

Gihatod dayon ngadto sa Vicente Sotto Memorial Medical Center, apan gideklarar sa mga doctor nga patay na ang maong biktima.

Hinuon mitahan dayon sa kapolisan ang suspetsadong drayber apan human magkasinabot ug ang tagtungod, gipagawas lang usab dayon kagahapon sa kapolisan ang  maong drayber. - Darrel A. Carumba (BANAT NEWS)