Trabahante gipusil patay

CEBU, Philippines - Namatay ang usa ka trabahante sa surplus dihang gipusil kini sa wala hiilhing kriminal didto sa Poblacion, dakbayan sa Mandaue kagahapon.

Ang biktima mao si Renos Alsada, 24, ulitawo, nga trabahante sa usa ka surplus sa maong dapit ug lumad nga taga lungsod sa Asturias.

Si PO3 Roy Cabrera sa homicide section sa Mandaue City Police Office (MCPO) mibutyag sa Banat News nga ang kriminal may kuyog nga babayeng nailhan lang nga usa ka Melisa.

Matud pa ni PO3 Cabrera nga si Melisa niadtong higayona nagpraktis pagpadagan sa motorsiklo dihang gisinggitan kini sa igsoon sa biktima.

Midugang si PO3 Cabrera nga ang kriminal miduol ngadto sa biktima ug nangutana nganong gisinggitan sila (Melisa).

Apan matud pa mikabad og dagan ang biktima busa gitirohan dayon kini ug ang samad niya sa bukobuko maoy namatyan niya.

Gipangita pa sa kapolisan ang suspek ug si Melisa. - Romeo Limpangog