Pagpahigayon og "2nd awarding gikadismaya

CEBU, Philippines - Nagsagol ang kadismaya ug kasubo sa pamilyang Burden sa planong pagpahigayon og laing awarding alang sa nakontrobersiya nga Texters’ Choice Award atol sa coronation night sa Miss Cebu 2009 niadtong miaging buwan.

Kahinumduman nga nabulabog ang maong special award dihang nahatag sa lain ang award imbes sa nakadaug nga si Kimberly Therese Burden.

Ang inahan ni Kimberly nga si Rowena Burden nitataw nga pag-usik-usik lang sa panahon ug kwarta sa gobiyerno ang pagpahigayon og laing awarding.

“I’m upset ana nga ideya kay it’s simplistic and useless nga solusyon kay na-do na man ang damage dili man na mao ang among gipangayo, what we are asking for is sanction, plain and simple. Kay ngano man? mabalik pa ba ang damage nga ilang na-do kung i-award? dili gyud na mao ang solusyon sa problema,” sumala ni Burden.

Sa nasayran, si City Administrator Francisco “Bimbo” Fernandez maoy nisugyot ngadto sa Cebu City Tourism Commission (CCTC) sa maong lakang.

Tumong sa City administrator niini nga mahatag ngadto kang Kimberly ang award nga nadaug sa dalaga atol sa coronation night sa Miss Cebu 2009.

Apan matud ni Burden nga usa lang ang ilang gusto nga mahitabo ug kini mao ang pagpalagpot sa mga tawo nga nalambigit sa kontrobersiya partikular na niini ang project chairperson nga si Philip Rodriguez ug ang labaw sa Miss Cebu secretariat nga si Cinbeth Orellano gawas kang Bruce Bollozos.

 Hinuon si Fernandez nagkanayon nga dawaton man o dili sa mga Burden ang award ilaha kining ihatag isip obligasyon sa siyudad apan wala kini magpasabot nga kalimtan nalang ang ubang isyu tungod kay solusyonan gyud kini sa dakbayan.

Una na hinuong gipahibawo ni Fernandez nga dunay “drastic move” nga himuon si mayor-on-leave Tomas Osmeña sa pagbalik niini sa Sugbu sunod buwan. - Elly Bolonos (BANAT NEWS)