13-anyos gipusil sa sikyu patay

CEBU, Philippines - Gipangita karun sa kapolisan ang usa ka gwardiya human kini nakapusil sa usa ka 13-anyos nga estudyante sa miaging adlaw pasado alas 2 sa hapon sulod sa garahian sa Ceres Bus sa Tagunol, barangay Basak-San Nicolas.

Ang maong batang napusilan mao si Ronnie Lucero, taga sitio Tayud, barangay Basak-San Nicolas kinsa nakabsan sa iyang kinabuhi diha na sulod sa Cebu City Medical Center human sa pipila ka oras nga pagkasulod didto gumikan sa samad pinusilan sa tangkugo lapos sa hubon.

Ang gipangitang gwardiya mao si Dante Yangan, 28, lumad nga taga Upper Bayaw, barangay Tuburan syudad sa Pagadian sa Zamboanga del Sur ug kasamtangang nagpuyo sa barangay Kamagayan ning dakbayan.

Ang biktima nagtungha sa grade four sa Inayawan Elementary School ug gituohang nadudahang kawatan ug gipusil sa suspek.

Matud pa sa imbestigasyon sa kapolisan, ang assistant maintenance manager nga si Gleen Cañone sa maong kumpanya, mi-report kaniya ang suspek mahitungod sa upat ka mga lalaking misuway og pangawat og mga puthaw sa ilang compound nga iyang gipasalbahan.

Sa dihang padulong na sila sa security agency mipasumangil nga mohapit sa ilahang balay ang suspek hinungdan nga miuna na lang siya (Cañone) sa maong buhatan, dangtan pila ka oras ang milabay wala moabot ang suspek hinungdan nga mibalik sa garahian ang manager.

Diha nalang niya nasayran nga dunay napusilan sa ilang compound ug ang gitumbok nga suspek mao si Yangan.

Ang mga ginikanan sa biktima nga sila si Anecita ug Rogelio mibutyag nga nagkuyog sa mga higala ang biktima ug nangagi sa dapit dihang nakadungog og buto ug diha nalang nila masayring napusilan si Lucero hinungdan nga mikaratil sila og dagan. – BANAT NEWS