Ms. Cebu 2009 organizers pasilotan gyud ni Tomas

CEBU, Philippines - Nameligro ang mga sakop sa Cebu City Tourism Commission (CCTC) nga nalambigit sa kontrobersiya sa Miss Cebu 2009 nga mag-atubang og bug-at nga silot.

Kini human ipahibalo ni City Administrator Francisco “Bimbo” Fernandez ang gipadangat kaniya nga mensahe ni Mayor-on-leave Tomas Osmeña nga pangitaan og pamaaging mopahuway na sa dayon ang kontrobersiya.

Nagdumili hinuon ang city administrator pagbutyag kun unsa ang buhaton sa mayor apan kini giingong himuon sa pagbalik sa mayor dinhi sa Sugbu sunod buwan.

“Ingon si mayor nako sa among pag-estorya nga we have to take drastic action to put this issue to rest,” sumala ni Fernandez.

Gitakda si Osmeña nga maabot sa Sugbu gikan sa Estados Unidos karong umaabot Marso 10 sigun sa giasoy niini ngadto sa city administrator.

“I’m very confident somehow that we will find a way nga ma-resolve ni to the satisfaction of everyone per se,” dugang pamahayag ni Fernandez.

Sa iyang bahin, hugot usab nga gihangop ni Dr. Rowena Burden, inahan ni Miss Cebu 2009 2nd Runner-up Kimberly Therese Burden nga migawas nga maong mananaog sa Texter’s Choice Award sa pamahayag sa mayor.“If they can do drastic action sa mga tawo nga na-involve sa controversy di mas maayo. Mas dali gyud nuon mahuman ang problema,” sumala pa ni Ginang Burden.

   Una nang mipadayag si Burden nga gusto nilang matangtang si Philip Rodriguez isip Miss Cebu beauty pageant project chairperson ug ang pagpapahawa kang Cinbeth Orellano sa Miss Cebu secretariat gawas sa pagdili kang Bruce Bollozos pagpanginlabot sa umaabot pa nga mga pageants.

Mitumaw ang kontrobersiya sa Miss Cebu 2009 dihang lain ang gitawag nga mananaog sa texters choice award imbes nga si Kimberly.

Una nang giangkon sa marketing consultant sa CCTC nga si Bollozos, nga maoy nasayop paghatag sa pangalan nga gibasa sa pageant host. – BANAT NEWS