CEBU, Philippines - Kahugpungan sa kababayen-an mireklamo ngadto sa Ombudsman Visayas gumikan sa wala pagpatuman sa preventive suspension kang Assistant City Prosecutor Mary Ann Castro.
Ang Legal Alternative for Women Center Inc. ug ang Law Inc. mikwestiyon usab sa pagkatudlo kang Castro isip hepe sa Board of the Special Inquiry sa Bureau of Immigration and Deportation kon BID-7.
Kini bisan paman dunay pending nga kasong graft and corruption sa Sandiganbayan si Castro may kalambigitan sa pasangil nga midawat kini og suborno gikan sa abogado sa giingong bigtime drug dealers nga naa pa karon sa korte.
Si Assistant Ombudsman Virginia Palanca Santiago nagkanayon wala na silay labot sa kaso ni Castro tungod kay atua na man kini sa Sandiganbayan sa pagkakaron.
Apan gitataw niini nga gumikan sa maong reklamo ilang utingkayon ang mga record sa kaso ni Castro aron masuta kun nganong wala gyud mapatuman ang preventive suspension sa maong piskal.
Samtang gipahibawo usab ni Santiago nga nidaug sa first stage ang prosecutor sa Ombudsman tungod sa pagbasura sa Sandiganbayan sa demurer of evidence ni Castro.
Kini nagkahulogang madayon na ang pagdagan sa kasong graft and corruption ni Castro ngadto sa korte.
Gani kagahapon, si Castro gipatambong sa hearing sa Sandiganbayan 2nd division sa Ilo-ilo diin gipresentar ni Castro ang iyang mga ebidensiya nga wala siya'y nalapas nga balaod sa pagdawat sa P20 mil gikan ni Atty. Genes Abellana, abogado sa managsuong gipasanginlang drug lords. – BANAT NEWS