Wala pay rollback sa minimum fare

CEBU, Philippines - Wala gyu'y nakab-ot nga desisyon ang mga opisyal og sakop sa board sa Land Franchising and Regulatory Board atol sa gipahigayong public hearing kagahapon sa buntag sa buhatan niini sa Manila nga una nang gitumong pagtuki sa gidemandang rollback sa pletihan sa mga PUJ nunot sa padayong pagkunhod sa presyo sa lana.

Si LTFRB-7 director Romulo Bernardez dihang nahinabi sa Banat News kagahapon sa udto sa telepono human gyud sa maong public hearing didto sa LTFRB Manila miingon nga igo rang gidawat ang mga petisyon. 

Ang mga gidusong petisyon sa rollback sa pletihan gikan sa nagkalain- laing rehiyon gikasabutan sa board nga tukion kini una sa mga regional directors kauban ni LTFRB chairman Alberto Suansing karung adlawa o ba kaha unya sa Biyernes.

Matud ni Bernardez nga gihatagan og higayun sa board silang mga regional directors nga makapangonsulta bahin sa rollback sa pletihan sa tanang mga local transport group aron makuha ang ilang sentimento niini.

Sa pagkakaron ang karaang petisyon lang kaniadto ni kanhi LTFRB director Manuel Iway nga nangayo og P2 nga rollback sa pletihan dihang P8 pa ang minimum ang iyang giduso.

Nasayran nga nakapatuman na og peso nga temporary nga rollback sa pletihan dinhi sa Central Visayas gikan sa P8 karon P7 nalang.

Gipasabot ni Bernardez nga wala maapil sa gidusong petisyon ang giandam nga petisyon nila ni Iway ug kanhi LTFRB-7 director Rogelio Osmeña nga nagtinguha pagpakunhod sa flag-down rate sa taxi gikan sa P30 ngadto nalang unya sa P25.

Rason sa duha ka kanhi LTFRB-7 director mao ang padayong pagbarato sa presyo sa LPG nga maoy sagad gigamit sa mga taxi unit karun ug ang laing peso nga rollback sa pletihan sa PUJ. – BANAT NEWS