Sikyo nagselos nanunggab

CEBU, Philippines - Gumikan sa pagselos, usa ka security guard nanunggab sa iyang silingan didto sa View Hills, Barangay Quiot ning dakbayan sa Sugbo.

Ang suspetsado mao si Arnold Batoto alyas Anot, 37, usa ka sikyo sa Fisher Security Agency nga taga Quiot , samtang ang biktima mao ra usab ang iyang silingan nga si Jeffrey Alferez, 26 .

Sumala sa biktima nga nagpaingon na siya sa iyang trabaho sa usa ka shell craft factory dihang giatangan siya sa suspek ug sa walay igong hinungdan gihansakan siya sa kutsilyo niini ug nasabak ang iyang tiyan.

Matud pa sa biktima nga nagselos kaniya ang suspek tungod kay ang kalive-in niini suod kaayo niya (biktima).

Samtang gihatod ang biktima ngadto sa tambalanan, nasikop usab sa kapolisan ang suspek.

Samtang sa laing bahin usa ka graduating student sa University of San Jose-Recoletos nadunggaban usab sa way igong hinungdan pasado ala una sa buntag kagahapon sa may skywalk sa barangay Mambaling.

Si Mark Jason Bacaltos,28, lumad nga taga barangay Lompan, Alegria ug kasamtangang nagpuyo sa San Roque Mambaling maoy biktima.

Ang biktima mibutyag nga naglakaw siya paingon sa ilang balay dihang giatangan siya og upat ka lalaki unya usa niini milanit og kutsilyo ug gihansak kaniya.

Human siya masabak sa bukton ug tiyan, misibat usab dayon ang nakadunggab kaniya.

Tua siya karon sa Cebu City Medical Center nagpaalim sa iyang mga samad samtang padayon pang gipangita sa kapolisan ang nakaluba kaniya. - Lesley Caminade (BANAT NEWS)