Pagsibog sa kaso way kondisyon

CEBU, Philippines - Giklaro ni Gobernador Gwendolyn Garcia nga walay nagpahipi nga mga kondisyon sa iyang pagsibog sa kasong libelo nga iyang gipasaka batok sa broadcaster ug komentarista si Leo Lastimosa atol sa ilang 30 minutos nga diyalogo nga gipasiugdahan ni RTC Judge Geraldine Faith Econg nga midismis sa maong kaso.

Matud ni Garcia iya nang gidawat ang tanang pagpasabot ni Lastimosa atol sa ilang close door conference diha sa sala ni Econg human sa pre-trial meeting niadtong miaging adlaw.

Kini human giangkon ni Lastimosa nga nasobrahan ra usab siya sa iyang komentaryo dihang walay nakatug-an kaniya sa kinatibuk-ang nagasto sa Cebu International Convention Center (CICC) nga gitukod alang sa Association of Southeast Asean Nation Summit niadtong 2007 matud pa ni Garcia sa interview sa DYDD kagahapon.

Nasayran nga si Lastimosa mibutyag nga bisan og nagkauli na sila si Garcia wala magpasabot nga mohunong na siya sa pagsabwag sa kamatuoran ngadto sa katawhan. - Rey B. Pasaporte (BANAT NEWS)