Pamilya sa tulo ka bata tabangan

CEBU, Philippines - Tabangan sa konseho sa dakbayan sa Lapulapu ang pamilya sa tulo ka mga batang napaig sa sunog diha sa sitio Five Star, barangay Babag dakbayan sa Lapulapu sa milabay'ng gabii.

Si Konsehal Marshal Ycong, ang Committee Chairman sa Social Services sa Konseho sa dakbayan sa Lapulapu tunolan   sa resolusyon nga mag-awhag nga tabangan ang pamilyang Sanchez.

Ang pamilyang Sanchez nakasugamak og trahedya sa dihang nasunog ang ilang balay ug nangapaig ang mga batang sila si Yenchelle Sanchez, 10; Yenche Marie,8; ug Mike John 5, nga maoy nabilin sa balay dihang namasahero ang ilang ginikanang sila si Michael ug Jocelyn.

Wala hinuon iklaro kun unsang hinabang ang ihatag unya sa banay'ng Sanchez, dili lang kini maoy unang higayon nga miabag ang dakbayan sa mga biktima sa trahedya.

Niadtong nalunod ang barkong M/V Princess of the Stars ug pagkahagsa sa C-130 sa Philippine Air Force sa lalawigan sa Davao mipagawas usab og kwarta ang dakbayan aron tabangan ang mga naapektahang residente sa Lapulapu. – BANAT NEWS