"Nangwarta" sa ka-chat' gi-entrap

CEBU, Philippines - Nagtingkagol ang usa ka babaye kinsa gipasanginlang nangilad og foreigner pinaagi sa pagpangilkil og kwarta pinaagi sa pakig-chat sa internet human sa gipahigayong entrapment sa kapolisan sa dakbayan sa Talisay niadtong Lunes sa hapon diha sa usa ka restaurant sulod sa mall sa barangay Tabunok, dakbayan sa Talisay.

Ang giingong pagpangilkil nagsugod pa niadto pang milabay’ng tuig ug nakakuha na og sobra sa P500 mil gikan sa usa ka negosyanteng Amerikano ang giilang si Arlene Jay “Jason” Von-os nga taga Michigan, USA.

Ang gidakop giilang si Josefa Cabañero alyas “Josie” taga barangay Mohon, Talisay.

Si Von-os nagpatabang sa iyang higalang Pilipina nga si Amelita Alolod taga Pooc Sugar Beach lungsod sa Santa Fe kinsa gisugo sa maong langyaw nga ipatan-aw ang kalihukan ni Cabañero tungod sa pagduda niini sa mga pangangkon niini nga nasakit ang iyang mga kabanay ug nangayo og salapi.

Matud pa ni PO3 Mikie Espina gigamit ra sa suspek ang iyang batang kabanay ug mismong anak niini aron makapangayo og kwarta sa maong langyaw pinaagi sa pagpamakak nga sila nasakit og dengue ug kinahanglan ang dakong salapi.

Tungod sa kaluoy ni Von-os wala usab siya magduha-duha pagpadala og salapi sa maong babaye hangtud nga kanunayon na kini og buhat sa suspek nga nakapaduda na hinuon sa langyaw.

Dihang nasubay nga pulos bakak ang mga pangangkon sa suspek diha-diha midangop si Alolod sa kapolisan aron arestuhon ang suspek pinaagi sa entrapment operation tungod kay niusab kini og pangayo og kwarta kay duna na say nasakit nga bata sa ilang pamilya.

Ang kapolisan pinangulohan nila ni Chief Inspector Jovito Canlapan ug Chief Inspector Alexander Soledad uban nila ni PO3 Rey Bucao, PO3 Mikie Espina, PO2 Roy Lofranco ug PO1 Alan Villasurda ang mipahigayon sa entrapment operation.

Kuyog ang mga polis ug laing higala ni Von-os nga si Markie Rosaceña nga taga dakbayan sa Mandaue gipahigayon ang entrapment, si Rosaceña maoy mitunol sa marked money nga 20 ka tag P500.

Diha sulod sa maong mall, giaresto si Cabañero human dawata ang maong salapi gikan kang Rosaceña.

Matud ni Alolod nga sa ilang panag-chat ni Jayson nagkanayon ang langyaw nga nakaluwas siya og kinabuhi sa kanunay niyang pagpadala og kwarta kang Cabañero, apan sa kadugayan nagduda na kini.

Tungod niini gihangyo sa langyaw si Alolod pagsusi sa Vicente Sotto Memorial Medical Center aron sutaon ang gi-email nga dokumento ni Cabañero nga giingong hospital record niini sa iyang pagsakit.

Niadtong Pebrero 12-13 nasuta ni Alolod wala masulod sa maong tambalanan si Cabañero ug hinimo-himo ra ang maong dokumentong gi-email nga giingong medical abstract.

Si Alolod midugang nga niining ulahi lang nakapadala og P23 mil ang langyaw kang Cabañero nga ibayad usab sa tambalanan. – BANAT NEWS