Bugas, sapot giapod sa nasunogan

CEBU, Philippines - Nanghatag og ginamit nga mga senina ingon man pagkaon si Kongresista sa Cebu South District Antonio Cuenco ngadto sa mga nasunogan sa barangay Alaska Mambaling niadtong Domingo sa buntag.

Si Cuenco maoy nangunay pagpanghatag sa mga senina aron masuta usab ang kahimtang sa mga nasunogan nga kasamtangan gipahiluna diha sa Viking Sports Complex sa Mambaling diin ang mga pamilyang nasunogan temporaryong nagpuyo.

Kada usa ka pamilya sa 251 ka mga kabus ang nakadawat og tag duha ka kilong bugas ug lain-laing matang sa mga linatang pagkaon.

Usa sa kagawad sa maong barangay Wilfredo Go, kinsa nikuyog sa kongresista pagbisita sa mga nasunogan nagkanayon nga nagpadayon ang ilang pagpanawat og hinabang unom ka adlaw human ang sunog miigo diha sa Alaska.

Matud ni Go, sila maoy nang apod-apod sa mga ginamit nga senina sa mga kabus nga pamilya nga naapektuhan sa maong sunog aron makasapar sa inadlaw-adlaw’ng panginahanglan.

Ang mga nabiktima sa sunog kasamtangan lang nagpuyo sa “tent” nga gipormag balay diha sa sports complex sa pagka karon.

Si Cuenco nisaad nga duna pay laing ihatag nga dugang hinabang karong umaabot nga mga adlaw ug mopahibawo lang nila sa mga barangay opisyales padayag ni Go. (Rey Pasaporte)   (BANAT NEWS)