Terte na ang hepe

CEBU, Philippines - Pormal nang gi-turnover ni Chief Supt. Ronald Roderos ang iyang posisyon isip hepe sa Police Regional Office (PRO-7) ngadto sa iyang Deputy Regional Director nga si Chief Supt. Federico Terte human usab siya adto na idestino sa Camp Crame.

Ang maong kalihukan nga gipahigayon mga alas 9:30 sa buntag diha sa headquarters sa PRO-7 nga gitambungan mismo ni PNP Chief Jesus Versosa Jr. uban sa mga dagkong opisyal sa PNP, Central Command, Gobernador Gwendolyn Garcia, acting Mayor Michael Rama ug uban pang mga lokal nga opisyal ug kahigalaan ni Roderos.

Si Roderos nipadayag sa iyang pasalamat sa mga lokal nga opisyal, katawhan sa Sugbu ug rehiyon ingon man sa iyang mga sakop nga nagpabiling nisuporta kaniya.

Si Roderos milingkod sa PRO-7 niadtong Disyembre 11, 2007 hangtud karong mga adlawa human niya hulipi si Chief Supt. Silverio Alarcio,Jr.

Usa sa gipasigarbo ni Roderos ang kamalinawon sa Central Visayas sa milabay’ng Asean Summit, ang malampusong barangay Election niadtong 2007, ang bag-uhay lang nga Sinulog grand mardi gras nga gitambungan sa 2.8 milyones ka mga tawo, lakip sa gipasigarbo niini pagdawat og award human mapiling Best Regional Peace and Order Council (RPOC-7).

Si Roderos gikatakdang makadawat sa iyang ikaduhang ‘star’ pagka-heneral sa Camp Crame maoy molingkod isip director sa Research and Development nga kanhi gihuptan sa iyang kaluha nga si Chief Supt. Ray Roderos.

Ang kaluha ni Roderos nga si Ray idestino sa Sugbu isip director sa Directorate for Integrated Police Operations (DIPO) Visayas.

 Samtang mipadayag si Rama sa iyang kasubo sa pagbiya ni Roderos tungod sa maayong labok nga gipakita niini sa rehiyon, apan nalipay nga ma-promote ang heneral pagbalhin sa Crame.

Si Roderos nahimong director sa Cebu City Police Office (CCPO) sa wala pa matudlo isip PRO-7 director.

Si Chief Federico Terte sa iyang bahin ang nipadayag nga iyang ipadayon ang mga nasugdang programa ni Roderos ug nagpasalamat usab siya sa katawhang Sugbuanon sa pagsalig kaniya.

Gipahibalo niini nga si Sr. Supt. Jesus Gaquing ang pangulo sa Regional Mobile Group (RMG-7) iyang ibalhin sa PRO-7 samtang si Sr. Supt. Rey Lyndon Lawas ang ihulip sa RMG. (Guam Logroño)             (BANAT NEWS)