Mipusil sa Indian gipangita

CEBU, Philippines - Padayon pang gipangita sa kapolisan sa dakbayan sa Talisay ang mipusil sa magtiayong Indian national didto sa sitio Tangub, barangay Lagtang, Talisay sa miaging semana.

Ang mga nabiktima mao sila si Baldev Singh, 35, ug ang asawa niining si Rani Geeta, 34, nga nagpuyo sa Southwinds Subdivision sa barangay Cansojong, dakbayan sa Talisay.

Ang maong mga biktima paingon na untang mouli gikan nga naningil sa ilang mga nangutang kanila dihang samtang nagsakay sila sa ilang motorsiklo, gitaparan sila og tulo ka wala ilhing mga lalaki nga nagsakay usab og usa ka itom nga motorsiklo unya namusil kanila.

Si Superintendent Henry Binas, hepe sa kapolisan sa dakbayan mibutyag sa Banat News kagahapon nga padayon pa sila sa ilang imbestigasyon sa maong hitabo ug pagpangita sa mga kriminal.

Matud ni Binas nga duna sila’y giimbitar nga drayber ug pasahero sa habal-habal nga taga dakbayan sa Toledo ug barangay Manipis, Talisay nga gikatahong misunod sa mga biktima sa wala pa kini pamusila, apan negatibo ang resulta dihang ila kining gipakita sa magtiayong Singh.

Ang magtiayong Singh wala pa makagawas sa tambalanan hangtod karon gumikan sa nahiagoman nilang mga samad agi sa bala sa armas nga gigamit sa mga kriminal sa pagluthang kanila.  - Brenda D. Batuto (BANAT NEWS)