CEBU, Philippines - Usa ka tawong walay Valentina, naghuramintado busa gisikop sa kapolisan ug gibalhog sa prisohan, atol sa Valentines Day didto sa Sitio Dasuna, barangay Das siyudad sa Toledo niadtong Sabado sa alas 3:30 sa hapon.
Ang gipriso mao si Alijandro Montero, 34 , ulitawo, way klarong trabaho nga taga Dasuna ug gisakmit usab ang shot gun nga iyang giwara-wara ug nanghagit og buno.
Si PO2 Dante Hilo sa Toledo City Police Station mibutyag sa Banat News nga ang suspek , nagbahas-bahas sa karsada nga lasbag ug gumikan kay shotgun nga dala niini puwerting hadloka sa mga tawong namiyesta kay basig paarakan sila sa mga bala niini.
Si SPO1 Calixto Sobillano kinsa usa ka polis nga nadestino sa Pinamungahan Police Station apan silingan ra sa suspetsado, miingon nga nagpanuko siya sa pagduol sa suspek kay pistola ray iyang dala niadtong higayona.
Busa mitawag dayon siya sa Das Police Station aron mangayo og abag pagdakop sa naghuramintadong suspek.
Daling mirespondi sila si SPO3 Socrates Aparicio ug SPO1 Romero Agustines ug nagtinabangay kini sa pagpasurender sa suspek.
Dihang nasikop na ang suspek, gisakmit usab sa kapolisan ang iyang shotgun nga may tulo ka buhing bala.
Gituohan sa mga nakasaksi nga walay Valentina ang maong suspek nga maoy hinungdan sa paghuramintado niini.
Karong buntag ipasaka na sa kapolisan ang kasong illegal possession of firearms batok sa suspek. - BANAT NEWS